संसदीय समितिका सभापतिमा तीन जनाको उम्मेद्वारी

काठमाडौं, १२ भदौं । संघीय संसद्को माथिल्लो सदन राष्ट्रियसभाका चारमध्ये तीन विषयगत समितिका सभापति पदका लागि आज उम्मेद्वारीको मनोनयन दर्ता भएको छ ।

संसद् सचिवालयले उम्मेद्वारी मनोनयनका लागि तोकेको समयावधिमा विधायन व्यवस्थापन समितिको सभापतिमा परशुराम मेघी गुरुङ र प्रत्यायोजित व्यवस्थापन तथा सरकारी आश्वासन समितिको सभापतिमा रामनारायण विडारीको एक मात्र उम्मेद्वारी परेको हो ।

राष्ट्रिय सरोकार तथा समन्वय समितिको सभापतिमा दिलकुमारी रावल थापा (पार्वती) मात्र उम्मेद्वारी परेको राष्ट्रियसभाका सचिव राजेन्द्र फूँयालले जानकारी दिए । सभापतिका तीनै उम्मेद्वार सत्तारूढ दल नेपाल कम्युनिष्ट पार्टी (नेकपा) का सांसद हुन् । दिगो विकास तथा सुशासन समितिको सभापतिमा भने कसैको पनि उम्मेद्वारी परेको छैन् । उक्त समितिको नेतृत्व दलहरुबीचको आपसी समझदारीका आधारमा लगत्तै चयन गरिने बताइएको छ ।

संसद् सचिवालयले निर्धारण गरेको सूचनाअनुसार आज बिहान ११ देखि साँझ ४ बजेसम्म उक्त उम्मेद्वारी मनोनयन दर्ता भएको हो । बुधबार बिहान ११ बजे बस्ने तीनै समितिका बैठकबाट सम्बन्धित सभापतिको चयन हुनेछ । राष्ट्रियसभा नियमावलीको दफा १५० मा समितिका सभापतिको निर्वाचनको व्यवस्था छ । ५९ सदस्यीय राष्ट्रियसभाका विषयगत समितिका बैठक हाल ज्येष्ठ सदस्यको अध्यक्षतामा हँुदै आएका छन् ।

Recommended For You

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.